Arıqlamaq üçün qreçka pəhrizi

07 Avqust 2019 Kateqoriya: Arıqlamaq üçün pəhrizlər Müəllif:
Oxuma vaxtı: 20 dəq Oxunma sayı: 48
Arıqlamaq üçün qreçka pəhrizi şəkil

Qreçka pəhrizi təkcə 7 günə arıqlamaq üçün deyil, həm də sağlamlıq üçün faydalıdır. Amma pəhrizdən sonrakı dövrdə də bəzi qaydalara əməl etmək lazımdır. Beləliklə, 15 kq-a qədər arıqlaya bilərsiniz.

Məqalənin içərisindəkilər:

  1. Arıqlamaq üçün qreçka pəhrizi
  2. Faydaları
  3. Çatışmazlıqları
  4. Kimlər qreçka pəhrizi saxlaya bilməz?
  5. Qreçka pəhrizinin növləri
  6. Klassik variant
  7. Qreçka ilə ekspress pəhriz
  8. Qatıqlı qreçka pəhrizi
  9. 7 günlük qreçka pəhrizi
  10. Qreçka pəhrizini necə bitirmək lazımdır?

Arıqlamaq arzusunda olan qadınların monodietalara olan marağı günbəgün artır. Belə pəhrizlərdə daim eyni qida növü istifadə etmək lazımdır. Bu cür pəhrizlərin mahiyyəti heç olmasa, 7 gün eyni qida ilə qidalanaraq artıq yeməkdən sığortalanmaqdır. Bu yolla orqanizm toksinlərdən daha tez azad olur və artıq çəkiləri daha sürətlə itirir. Belə qidalardan biri qarabaşaq yarmasıdır.

Arıqlamaq üçün qreçka pəhrizi 1 şəkil

Arıqlamaq üçün qarabaşaq pəhrizi

Arıqlamaq üçün qreçka pəhrizi kifayət qədər effektli üsuldur. Bu pəhriz, adətən, monodietalara aid edilir, amma rasiona digər qida məhsulları daxil edilən başqa növlər də var. Təkcə qarabaşaq sıyığı ilə artıq çəkidən azad olmaq istəsəniz, nəticə daha yaxşı ola bilər.

Pəhrizi saxlayanların yaxşı nəticələrə nail olma səbəbi yarmanın faydalı xüsusiyyətləri ilə bağlıdır. Forumlarda arıqlamaq üçün qreçka pəhrizi seçmiş şəxslərin rəylərində rastlaşmaq olar ki, qarabaşaq tək arıqlamağa yox, həm də əhval-ruhiyyənin yaxşılaşmasına kömək edir. Bir çoxları dərinin daha təmiz və daha sağlam göründüyünü deyirlər.

Pəhrizin əsas effekti onun əsas tərkib hissəsi – qarabaşaq sayəsində meydana çıxır. Çünki qarabaşaq mikroelementlər, makroelementlər, minerallar və vitaminlərlə zəngindir. Belə tərkib dənli bitkilərin hamısı üçün xarakterik deyil və bundan başqa, onların qarabaşaqda miqdarı da kifayət qədərdir. Ona görə də hətta pəhriz saxlamasanız da, rasionda qarabaşağa yer verməlisiniz. Qarabaşaq yarması, sıyığı, cücərtiləri sağlam qidalanma menyusuna daxildir.

Faydaları

Qarabaşaq tərkibinə görə faydalı bitkidir. O, mürəkkəb ləng karbohidratları sayəsində adamı doydurur və uzun müddət tox qalmasına, enerjidolu olmasına şərait yaradır.

Belə ki, qarabaşaq bitki zülallarına malikdir və bu zülallar sayəsində hətta ən ağır rasionda da əzələ kütləsi qorunacaq.

Yağ və aminturşular hesabına orqanizmdə və hüceyrələrdə maddələr mübadiləsi yaxşılaşır. Bitkinin lifləri sayəsində bağırsaqlar şlaklardan və toksinlərdən qurtulur.

Bütün bunlarla yanaşı, qarabaşaq minerallar, vitaminlər, limon turşusu və oksalat turşusuna malikdir. Bunlar özləri də orqanizmdə bir çox proseslər üçün çox faydalıdır.

Qarabaşaq həqiqətən doyumludur. Onu yeyəndən sonra yenə nəsə yeməyə istək qalmır. Buna səbəb ləng karbohidratlardır. Həmin karbohidratlar şəkərə sürətli parçalanmır, bu isə o deməkdir ki, yağ şəklində toplanmır, yəni kökəltmir.

Arıqlamaq üçün qreçka pəhrizi 2 şəkil

Liflər bağırsaqlarda genişmiqyaslı “təmizlik edir” – tullantıları və şlakları orqanizmdən xaric edir. Orqanizm daha da rəvan işləməyə başlayır. Çünki bağırsaqda toplanan şlaklara görə mədə-bağırsaq traktı orqanlarının divarları faydalı maddələri mənimsəyə bilmir. Pəhrizə düzgün əməl etsəniz, o sizi təkcə arzuolunmaz çəkidən azad etməyəcək, həm də xəstəliklərdən qurtaracaq, cavanlaşdıracaq. Beləliklə, daha sağlam və daha xoş görünüşə sahib olacaqsınız. Bu xüsusiyyətinə görə qarabaşaq pəhrizi başqa pəhrizlərdən üstündür.

Qarabaşaq yeməkləri bütün orqanlara və onların funksiyalarına yaxşı təsir edir və nəticədə:

  1. İmmunitet yüksəlir;
  2. Damar divarları möhkəmlənir;
  3. Qan dövranı yaxşılaşır;
  4. Xolesterin azalır;
  5. Qaraciyər və mədə normal fəaliyyət göstərir;
  6. Ödemlər və yanğı hissi gedir;
  7. Dəri ipək kimi yumşaq və hamar olur;
  8. Stress vəziyyətləri daha asan yaşanır.

Qarabaşaq pəhrizinin başqa praktik müsbət cəhətləri də var:

  1. Belə pəhriz əksəriyyət üçün əlçatandır;
  2. Yeməkləri hazırlamaq çox asandır;
  3. Qarabaşaq yarmasını istənilən supermarketdə və hətta balaca mağazada belə tapmaq olar;
  4. Tərkibində heç bir konservant, nitrat və başqa zərərli maddə yoxdur;
  5. Pəhriz çox sadədir və hətta vegetarianlar da onu saxlaya bilər;
  6. Nəticəni isə çox uzun müddət gözləmək lazım gəlməyəcək, bir həftə sonra arıqlamağınız görünəcək.

Çatışmazlıqları

Bütün başqa monodietalarda olduğu kimi qarabaşaq pəhrizinin də öz çatışmazlıqları var. Qaynar suda öz buxarında dəmlənmiş qarabaşaq, yaşıl çay və ya ot çayı ilə birtərəfli qidalanma nəticəsində orqanizm üzülür və qarabaşağın elə özünün də həzmi üçün fəaliyyət göstərən vəzlər zəifləməyə başlayır. Ona görə də pəhrizdən sonra qidalar zəif mənimsənilir.

Orqanizm belə qidalanma tərzinə sürətlə öyrəşir və 14 gün sonra arıqlama prosesi tormozlanır.

Qarabaşaq nə qədər zəngin tərkibli olsa da, orqanizmin qidalı maddələrə olan tələbatını təklikdə ödəyə bilməz. Ona görə də sıyıqlarla yanaşı, vitamin-mineral kompleksləri içmək lazımdır ki, hipovitaminoz inkişaf etməsin.

Məhz bu amillər zəifliyə, yorğunluğa gətirib çıxarır; qan təzyiqi kəskin azala, xroniki xəstəliklər kəskinləşə bilər.

Beləliklə, nə qədər güclü iradə sahibi olsanız da, qarabaşaq pəhrizi saxlayarkən ehtiyatı əldən verməyin. Əgər hər hansı bir simptom meydana çıxarsa, pəhrizi dərhal dayandırmaq və sağlamlığı təhlükə altına qoymamaq lazımdır. Bununla yanaşı, qarabaşaq pəhrizinə bəzi əks göstərişlər var.

Arıqlamaq üçün qreçka pəhrizi 3 şəkil

Kimlər qarabaşaq pəhrizi saxlaya bilməz?

Qarabaşaq pəhrizinə əks göstərişlər, adətən, həkimlər tərəfindən təyin olunur. Həkimlərin fikrincə aşağıdakı hallarda qarabaşaq pəhrizi tutmaq olmaz:

  1. Şəkərli diabet;
  2. Güclü depressiya;
  3. Hamiləlik və körpəyə ana südü vermə dövrü;
  4. Qarında cərrahiyyə əməliyyatı aparılıbsa;
  5. Böyrək problemləri;
  6. Klimaks;
  7. Ürək-damar və ya mədə-bağırsaq xəstəlikləri.

Uşaqlara və yeniyetmələrə də təkcə qarabaşaq yemək olmaz. Çünki onların bədəni inkişafdadır və onlara çox diqqətli yanaşmaq lazımdır. Hemoqlobinin səviyyəsinin az olması və güclü fiziki yüklənmələr zamanı həkiminizlə məsləhətləşməlisiniz. Çünki pəhriz stressdir və ona hazır olmaq lazımdır. Bütün çətinliklərə baxmayaraq, pəhriz saxlamağa qərar vermisinizsə, onda qaydalara dəqiqliklə əməl edin.

Qarabaşaq pəhrizinin növləri

Çox kəskin pəhriz çox yaxşı nəticələr verə bilər, amma nisbətən yüngül pəhrizlə də belə nəticəyə nail olmaq mümkündür, sadəcə arıqlama prosesi bir az ləng gedəcək. Qarabaşaq pəhrizinin növləri həddən çoxdur. Sadəcə olaraq, pəhrizi seçərkən nəzərə almaq lazımdır ki, pəhrizin menyusuna daxil olan qidaları qarabaşaqla yanaşı yeyə biləcəksinizmi, ya yox.

Kəskin, ciddi pəhriz zamanı yalnız qarabaşaqla qidalanmalı olacaqsınız. Belə pəhriz zamanı qarabaşaqlı yeməklər müxtəlif şəkildə hazırlanır: qaynar suda isladılır və öz buxarında dəmlənir; sıyıq kimi bişirilir və ya yarıçiy hazırlanır. Bununla yanaşı, gün ərzində iki litrdən az olmamaq şərtilə çoxlu su içmək lazımdır.

Qatıqlı qarabaşaq pəhrizində gün ərzində bir litr qatıq içməyə də icazə verilir. Onu qarabaşağa qata da bilərsiniz ki, yeməyiniz nisbətən dadlı olsun.

Sadə pəhrizlərin özünün də çoxsaylı növləri var. İstənilən sadə qarabaşaq pəhrizində rasionun əsas yeməyi qarabaşaq sıyığıdır. Belə qarabaşaq pəhrizlərində fərq qarabaşaqla yanaşı yeyilən qidalardadır. Sadə qarabaşaq pəhrizlərini nəinki günlərlə, hətta həftələrlə saxlamaq olar.

Pəhrizi seçərkən artıq çəki, arıqlamaq üçün nəzərdə tutduğunuz vaxt, sağlamlıq və əks göstərişlər nəzərə alınmalıdır.

Arıqlamaq üçün qreçka pəhrizi 5 şəkil

Klassik variant

Klassik variantda qarabaşaqdan başqa heç nə yemək olmaz. Hətta duzlamaq da olmaz. Gün ərzində 6 dəfə yemək və təxminən 2 litr su içmək lazımdır. Su yeməkdən 30 dəqiqə əvvəl və ya 30 dəqiqə sonra içilə bilər.

Beləliklə, qarabaşaq pəhrizində menyu kasaddır:

  1. Səhər yeməyi – yarım litr su və 30 dəqiqə sonra qaynadılmış qarabaşaq
  2. Qəlyanaltı – 1 stəkan su
  3. Nahar – qarabaşaq və yarım saat sonra bir stəkan su
  4. Günortadan sonra – əvvəlcə bir stəkan su, sonra az porsiyalı qarabaşaq, daha bir stəkan su
  5. Axşam yeməyi – günortadan sonrakı yeməyin eynisi olmalıdır, sadəcə olaraq porsiyanı artırmaq lazımdır.

Bəzən menyunu bir az da olsa rəngarəng etmək üçün suyun əvəzinə yaşıl çay, meyvə və ya ot çayı içmək olar. Əgər pəhrizi saxlamağa tab gətirə bilmirsinizsə, birbaşa yağlı, şirin və ya qızardılmış yeməklərə keçmək lazım deyil. Çünki belə etdikdə vəziyyətiniz qusma və zəhərlənməyə qədər pisləşə bilər. Yaxşı olar ki, qarabaşaqla yanaşı başqa qida da istifadə edəsiniz və nisbətən yüngül pəhrizə keçəsiniz.

Qarabaşaqla ekspress pəhriz

Sürətli arıqlamağı hamı istəyir. Belə pəhrizləri bir neçə gün saxlamaq olar və onların qaydalarına ciddi əməl etmək lazımdır. Qarabaşaqla ekspress pəhriz kəskin olsa da, rasionu rəngarəngdir. Ona görə də orqanizm onu daha rahat qəbul edir.

İlk gün bir stəkan su içilir və yarım saat sonra sıyıqla səhər yeməyi yeyilir. Naharda sıyıq və yağsız qatıq, axşam yeməyində isə bir stəkan su və yarım saat sonra yenə də sıyıq istifadə olunur.

İkinci gün səhər yeməyində suya bir qaşıq bal qatılıb içilir; naharda istənilən növ çox şirin olmayan meyvə, məsələn, portağal və ya kivi; axşam yeməyinə isə bir fincan çay əlavə oluna bilər.

Üçüncü səhər yeməyində su balsız içilməlidir, əvəzində isə sıyıqla yanaşı meyvə qurusu da yemək olar. Meyvə qurusu zövqə görə seçilə bilər. Naharda qarabaşaqla yoqurt. Axşam yeməyində qarabaşaq qaynadılmış alma və ya quru meyvə ilə yeyilir.

Dördüncü gün səhər yeməyində daha çox maye içmək olar; su və ya qatıq içilir və təbii ki, qarabaşaq yeyilir. Naharda sıyıqdan başqa salat da yeyilir və çay içilir. Axşam yeməyində isə tərəvəz şirəsi və sıyıq.

Pəhrizin beşinci günü səhər su içilir və sıyıq meyvə qurusu ilə yeyilir. Naharda kəsmik və alma ilə özünüzü aldatmalı olacaqsınız, amma sıyığı yenə də yeməlisiniz. Axşam yeməyində isə sıyıq və təzə sıxılmış meyvə şirəsi içilir.

Altıncı gün səhər əvvəlcə su içilir və sıyıq yeyilir, sonra dünənki meyvə şirəsi qalıbsa, içilir. Naharda qarabaşaqla bərabər yoqurt, alma və darçın istifadə olunur. Axşam yeməyində qarabaşaq 0-1%-li qatıqla yeyilir.

Yeddinci günün səhəri qarabaşaq sıyığı meyvə qurusu ilə yeyilir, su və çay içilir. Naharda qarabaşaq sıyığından hazırlanmış şorba, toyuğun döş əti, soğan və göyərti yeyilir. Kartof qətiyyən olmaz! Axşam yeməyində sıyıq və təzə sıxılmış meyvə şirəsi.

Qatıqlı qarabaşaq pəhrizi

Qatıqla qarabaşaq pəhrizi inanılmaz nəticələr verdiyindən insanlar arasında çox məşhurdur. Eyni yarma ilə yağsız, duzsuz, şəkərsiz və yarıçiy şəkildə qidalanmaq insanı üzür və hətta günün sonunda artıq yeməyə vadar edir. Qatıq özü artıq çəki ilə mübarizədə kömək edir, sıxıcı qarabaşaq menyusuna rəng qatır. Onlar birlikdə həzm proseslərinə müsbət təsir göstərir, sinir sistemini sakitləşdirir, dərini yaxşılaşdırır və insana özünü sağlam hiss etdirir.

Amma bəzi qaydalara əməl etmək lazımdır:

Qarabaşağı nə qədər istəyirsən yemək olar, amma ac olanda yemək lazımdır və həddən artıq da yeyilməməlidir. Qatığın 0%, 0,5% və ya maksimum 1%-li növündən istifadə olunur. Gün ərzində 1 litrdən çox içilməməlidir. Suyu isə əksinə çox içmək lazımdır. Nə qədər çox su içərsinizsə, bir o qədər yaxşıdır. Suyun gündəlik norması 2 litrdir və minimum 2 litr içilməlidir.

Bundan başqa, nəzərə almaq lazımdır ki, təzə qatıq köpü olanlara, üçgünlük qatıq isə mədədə yanğı hissi, qastriti və ya qəbizliyi olanlara məsləhət görülmür.

Yarmanı qaynar suda isladaraq öz buxarında dəmləmək və ya çiy yemək olar, amma o, qaynadılmamalıdır. qatıq ya sıyığa qatılır, ya da tək içilir.

Aşağıda bir neçə resept vermişik, onları istənilən şəkildə növbəli istifadə edə bilərsiniz.

Qarabaşaq qaynayan suda isladılır, bürünür, qapağını qoymaq yaxşı olar və öz buxarında dəmlənir. Nəzərə alın ki, yemək hazır olduqda dən-dən olmalıdır. Bunun üçün hazırlanarkən bir stəkan qarabaşaq iki stəkan su nisbəti nəzərə alınmalıdır. Yalnız ac olanda yeyin. Gün ərzində 6 dəfə yemək kifayətdir. Sonuncu yemək yatmazdan bir neçə saat əvvəl olmalıdır. Qatıq su kimi yatmazdan yarım saat əvvəl və ya sonra içilir.

İkinci resept daha da asandır. Qarabaşaq yuyulub yenə də 1:2 nisbəti nəzərə alınaraq qatıqla isladılır. Yarma suyu özünə çəkib şişməsi üçün gecəni saxlayırlar. Səhər isə artıq yemək olar. Yaxşı olar ki, bütün yeməyi gün ərzində yeyib qurtarasınız. Qarabaşaq zəhərlənməsi ət zəhərlənməsi kimi dəhşətli ola bilər. Əvvəlcə 1 stəkan qarabaşaq hazırlamağa cəhd edin və əgər kifayət etməzsə, iki stəkan götürə bilərsiniz.

Beləliklə, qarabaşaq qaynar suda isladılıb bütün gecəni saxlanır, səhər isə qatıqla yeyilir.

Qatıqlı pəhriz gün ərzində bir kiloqrama qədər arıqlamağa kömək edir. Onu üç gün, hətta bir neçə həftə saxlamaq olar. Daha uzun müddət belə pəhrizə riayət etmək əhəmiyyətsizdir. Çünki belə olan halda arıqlamağa davam etməyəcəksiniz, əksinə nəticəni korlayacaqsınız. Qatıqlı pəhriz klassik pəhriz qədər çətin görünərsə, daha qoruyucu pəhriz seçə bilərsiniz. Yəni rasiona təkcə qatıq və qarabaşaq deyil, həm də ət, balıq, meyvə-tərəvəz və yumurta daxil edə bilərsiniz. Bu cür pəhrizə daha uzun müddət davam gətirmək olar və bu, əvvəlkilər kimi çətin olmayacaq.

Arıqlamaq üçün qreçka pəhrizi 11 şəkil

7 günlük qarabaşaq pəhrizi

Özünüz üçün müəyyənləşdirin ki, nəyi daha çox istəyirsiniz: sürətli və əziyyətli arıqlamağı, yoxsa sizin üçün sağlamlığınız hər şeydən vacibdir? Belkə də, tez bir zamanda ağır pəhrizlə 10 kq arıqlamaqdansa, tədricən 7 kq arıqlayasınız və bir-iki ay sonra qorxusuz və sağlamlığınıza ziyan vurmadan həmin pəhrizi təkrarlayasınız?!

Bu proqram azkalorili qidalanma çərçivəsindən çıxmadan orqanizmə çox faydalı təsir edir. Gün ərzində içdiyiniz suyun miqdarına nəzarətdən başqa heç bir xüsusi qayda yoxdur. Sadəcə olaraq menyuya əməl edin və çalışın ki, qidaları əvəzləməyəsiniz. Yeyərkən asta-asta yeyin ki, doyma hissini vaxtında duyasınız.

Bir həftəlik qarabaşaq pəhrizinin menyusu

Birinci gün:

  1. Səhər yeməyi qarabaşaq sıyığı, üzərinə limon suyu gəzdirilmiş yerkökü və kələmli salatdan təşkil olunur.
  2. Naharda birinci yemək kimi tərəvəz şorbası, ikinci yemək kimi isə qarabaşaq və az qaynadılmış yumurta
  3. Axşam yeməyində qarabaşaq və azacıq zeytun yağlı vineqret.

İkinci gün:

  1. Səhər yeməyi – qarabaşaq; kələm, pomidor, göyərti və ispanaqdan ibarət salat.
  2. Nahar – qarabaşaqlı, tərəvəzli raqu
  3. Günortadan sonra – azkalorili kəsmik
  4. Axşam yeməyi – qarabaşaq

Üçüncü gün:

  1. Səhər yeməyi – qarabaşaq və sobada bişirilmiş qovun və ya qovun sukatı (şəkər şərbətində bişirilmiş və qurudulmuş)
  2. Qəlyanaltı – qaynar suda dəmlənmiş qarabaşaq
  3. Nahar – yüngül borş
  4. Axşam yeməyi – qaynar suda dəmlənmiş qarabaşaq və qara gavalı

Dördüncü gün:

  1. Səhər yeməyi – qarabaşaq və yaşıl sousda yaşıl lobya
  2. Nahar – qarabaşaq və qaynadılmış döş əti
  3. Axşam yeməyi – darçın, alma və qarabaşaq.

Beşinci gün:

  1. Səhər yeməyi – sıyıq və buxarda bişirilmiş brokkoli
  2. Nahar – ağ balıq qulağı və qarabaşaq
  3. Axşam yeməyi – qarabaşaq və tropik salat

Altıncı gün:

  1. Səhər yeməyi – qarabaşaq, təzə xiyar və mərcimək
  2. Nahar – yüngül şorba, alma və qarabaşaq
  3. Axşam yeməyi – qarabaşaq və qatıq.

Yeddinci gün:

Razqruzka (maye) günü aparılmalıdır. Yəni gün ərzində şirə və su hərəsindən 1,5 l olmaqla içilir. Atışdırmaq olmaz. Nəsə yemək istədikdə, su için.

Qarabaşaq pəhrizini necə bitirmək lazımdır?

Pəhrizdən adi rejimə keçmək çox əhəmiyyətlidir. Belə ki, bu dövr düzgün proqramlaşdırılarsa, nəticələr uzun müddət davam edər.

Bundan başqa, pəhrizə və əksinə keçidlər orqanizm üçün stresdir. Belə ki, orqanizm qarabaşaqdan başqa heç nə qəbul etməməyə öyrəşdiyi vaxtda tamamilə əvvəlki kimi qidalansanız, özünüzə ziyan vura bilərsiniz. Arıqlamaq üçün qreçka pəhrizi saxlayarkən mədə genişlənə bilər və belə nizamsız keçid çox yeməyə, nəticədə kökəlməyə səbəb ola bilər. Ona görə də pəhrizdən sonra da az-az və tez-tez yeməyə çalışın. Yatmazdan əvvəl yeməyin. Çox istəsəniz ki, nəsə yeyəsiniz, onda yemək əvəzinə istənilən yağsız süd məhsulundan istifadə edə bilərsiniz. Suyu sonralar da çox içmək lazımdır, onu kofe və qazlı sularla əvəzləməyin.

Daha bir həftə rasiona müxtəlif tərəvəzləri az-az daxil etmək lazımdır. Amma bu zaman nişastası daha az olan tərəvəzləri seçməlisiniz. Daha sonra yağsız ət və balıq daxil edə bilərsiniz. Bulyon həddən artıq bəsləyici olmamalıdır. Qarabaşağı yeməyə davam etmək olar, amma dozanı azaltmaq şərtilə. Həftədə bir dəfə razqruzka günü edin; həmin günü alma, qatıq, süd, şirə və s. ilə də edə bilərsiniz. Pəhrizi düzgün sonlandırsanız, növbəti ayda daha bir neçə kiloqram artıq çəki ata bilərsiniz.

 

 

Bu yazını paylaşın:
Yazını qiymətləndirin:
Şərhlər
Bu yazıya ərh yazılıb

Bir cavab yazın

Sizin e-poçt ünvanınız dərc edilməyəcəkdir.