Artıq çəki problemi yaşayan insanlar sağlamlıq və arıqlamaq üçün bəzən yanlış istiqamət seçirlər. Qidalanma xətaları arıqlamaq əvəzinə çəki artımına səbəb olur. İtirdiyiniz çəkinin geri qayıtmasını istəyirmirsinizsə, bu prosesə ciddi yanaşın. Ev şəraitində arıqlamaq üçün əhali arasında formalaşan səhv düşüncələrdən uzaq durun.
Arıqlamaqla bağlı yanlış addımlar – səhər yeməyindən imtina etmək
Arıqlamaq niyyətilə bir çox insan səhər yeməyindən əl çəkir. Bu yolla çəki atacağını düşünür. Amma bu yalnış davranışdır. Belə vəziyyətlərdə bir müddət çəki azalır, sonra maddələr mübadiləsi tormozlanır. Nəticədə arıqlama sürəti yavaşıyır, ən pis halda isə bədən əvvəlki formasını alır. Pəhrizə ilk başladıqda səhər yeməyini ixtisara salıb, sürətlə arıqlamaq mümkündür. Lakin 2-ci ayın sonunda çəki itkisinin tamamən dayandığını görəcəksiniz. Bu zaman insanlar digər pəhriz növlərini sınasa da, arıqlamırlar. Əksinə itirilmiş kiloqramlar ikiqat geri qayıdır.
Çörək yemədən arıqlamaq
Karbohidratların iştirak etmədiyi dietalara əməl edən şəxslər çörək yemədən arıqlamağın mümkün olacağını düşünürlər. Karbohidrat qəbulunu tam kəsmək insanı şəkərli qidalara, şirniyyatlara yönəldir. Çörəyin tərkibindəki maddələr xoşbəxtlik hormonu – endorfinin sintezini təmin edir. Çörəyi menyudan çıxartdıqda doyma hissi yaranmır. Bulğur, makaron kimi qidalar rasiondan uzaqlaşdırıldıqda insanda şəkərli qidalara meyllik artır. Buna görə də cörəkdən tam imtina etmək əvəzinə düzgün karbohidratları seçmək lazımdır. Məsələn, ağ undan hazırlanan çörək yerinə kəpək, düyü əvəzinə isə bulğurla qidalanın.
Un məmulatları ilə qidalanmaq
Bulka, simit, açma, poğaça və digər un məmulatlarını hər gün yedikdə həm orqanizmə zərər yetirilir, həm də insan kökəlir. 1 dənə poğaça 250-450 kaloriyə malikdir. Tam buğda unundan bir dilim çörək doyuzdurucu olmaqla yanaşı, qidalı maddələr hesabına qanda şəkəri tənzimləyir. Şirniyyat və un məmulatları şəkərin səviyyəsini sürətlə yüksəldib-endirir, aclıq hissini artırır.
Su içməməklə arıqlamaq
Bəzi insanlar suyun ödem (şişkinlik) yaratdığını düşünürlər. Maye qəbulunun azaldılması düzgün addım deyil. Əksinə ödemdən azad olmaq üçün su içmək lazımdır. Hər bədən kiloqramına 30 ml su qəbul etmək gərəkdir. Yəni çəkisi 60 kq olan insan gündə 1.8 litr su içməlidir. Soyuq havalarda bədən tərləmədiyi üçün daha çox ödem yaranır. Bu səbəbdən soyuq havalarda su istifadəsi artırılmalıdır. Kifayət qədər su içmədikdə həzm prosesləri, eləcə də maddələr prosesi ləngiyir. Gündəlik rasionda suyun azlıq təşkil etməsi, çay və ya qəhvə istifadəsinin çox olması metabolizmi zəiflədir.
Qidanın bişirilmə qaydalarına və porsiyalara diqqət etməmək
Bir çox insan yemək yeyərkən porsiyaya nəzarət etmir. Arıqlamaq üçün salatlar əksərən çox yeyilir. Əslində isə salat qəbulu bir kasa ilə məhdudlaşmalıdır. Pəhrizə daxil olan ət sobada və ya buxarda bişməlidir. Amma insan pəhrizdə yazılan miqdarda əti dönər şəklində yemək istəsə, bu düzgün qidalanma olmayacaq. Meyvə və qurumeyvələrin də porsiyasına diqqət yetirilməlidir.
Ağır pəhrizlərlə arıqlamaq
Arıqlamaq üçün şok dietalar arabir tətbiq oluna bilər. Tamamən və uzun müddət ac qalaraq arıqlamaq tibbdə bəyənilmir. Çünki insanın gün ərzində ehtiyac duyduğu zülal, yağ və karbohidratlar vardır. Qida maddələrinin çatışmazlığı orqanizmdə gedən bütün prosesləri ləngidir. Əlbəttə ki, bu vəziyyətdə arıqlamaq mümkün olmayacaqdır.
Tək (mono) tipli qidalanma ilə arıqlamaq
Balanslaşdırılmamış təkyönlü pəhrizlərdən qaçmaq lazımdır. Sadəcə zülal, karbohidrat və ya təkcə tərəvəz yeməklə qısa müddətdə arıqlaya bilərsiniz. Ancaq belə dietanın orqanizmə zərəri həddindən artıqdır.
Xülasə
Sonda tövsiyə edirik ki, orqanizminizi birdən-birə yükləməyin. Qısa müddətdə deyil, tədricən arıqlamaq sağlamlığınız üçün daha xeyirlidir.